Shivrajyabhishek Din Raigad : रायगड शिवराज्याभिषेक दिन सोहळ्यासाठी सुवर्णालंकारित तोरण

NewsZenn Jun 3, 2026 46 0

कोल्हापूर : शिवराज्याभिषेक दिन सोहळ्यासाठी सह्याद्री प्रतिष्ठानच्या वतीने रायगडावरील महाद्वारासाठी सुवर्णालंकारित तोरणाची निर्मिती केली आहे. मंगळवारी या तोरणाचे पूजन अ. भा. शिवराज्याभिषेक महोत्सव समितीच्या मार्गदर्शिका संयोगीताराजे यांच्या हस्ते झाले. जुना राजवाडा येथे हलगी पथकांच्या तालात, बाराबंदी मावळ्यांच्या पोषाखात आणि आंबिल-घुगऱ्या, भाकरी-वडीच्या मराठमोळ्या नैवेद्यासह तोरणाचे पूजन झाले.

अखिल भारतीय शिवराज्याभिषेक महोत्सव समितीतर्फे 5 व 6 जून रोजी रायगडावर होणाऱ्या सोहळ्यानिमित्त इतिहास, दुर्गसंवर्धन आणि शिवकालीन परंपरा जपणाऱ्या संस्था-संघटनांना विविध मान देण्यात आले असून, महादरवाजाला तोरण बांधण्याचा मान यंदा कोल्हापूरच्या सह्याद्री प्रतिष्ठानला मिळाला आहे. संयोगिताराजे छत्रपती यांच्या संकल्पनेतून 12 फूट लांबीचे तोरण साकारले आहे. मूर्तिकार अशोक सुतार यांनी बास ऑईल माध्यमातून घडविलेल्या तोरणावर गणपती, स्वस्तिक, सुवर्णहोन, मोर, पोपट, छत्र, घुंगुरू यांसह शिवकालीन राजवैभवाचे प्रतीक असलेले सोन्याचा मुलामा दिलेले कलश आहेत. यावेळी फत्तेसिंह सावंत, हेमंत साळोखे, सुखदेव गिरी, प्रवीण हुबाळे, प्रसन्न मोहिते, उदय घोरपडे, धनाजी खोत, प्रदीप थोरवत, अमर पाटील यांच्यासह शिवभक्त मोठ्या संख्येने उपस्थित होते.

रायगडाच्या महादरवाजावर पितळेचे ऐतिहासिक तोरण

महोत्सव समितीचे अध्यक्ष संदीप खांडेकर आणि कार्याध्यक्ष सुखदेव गिरी, यांच्यासह इतर पदाधिकाऱ्यांच्या उपस्थितीत आयोजित पत्रकार परिषदेत अधिकृत माहिती देताना समितीने सांगितले की, "यंदा रायगडाच्या महादरवाजावर 12 फूट लांब आणि 2 फूट उंच पूर्ण पितळेचे ऐतिहासिक तोरण पहिल्यांदाच बसवले जाणार आहे. या तोरणावर गणपती, स्वस्तिक, मोर आणि पोपट यांसारखी पारंपारिक शुभचिन्हे कोरली आहेत. छत्रपतींच्या सुवर्ण होणाच्या प्रतिमा देखील विशेषरित्या कोरण्यात आल्या आहेत. या तोरणाच्या एक बाजूवर “श्री राजा शिव” आणि दुसऱ्या बाजूला “छत्रपती” असे लिहिण्यात आले असून 5 जून रोजी तोरण महादरवाज्यावर प्रतिष्ठापित केले जाईल, असे समितीने स्पष्ट केले.