Silver Price Crash : चांदीचा मोठा धक्का! अवघ्या 2 दिवसांत 23 हजारांची घसरण, गुंतवणूकदारांची चिंता वाढली

NewsZenn Jun 19, 2026 16 0

Silver Price Down : शेअर बाजार, सोने-चांदी सगळंच शुक्रवारी जमिनीवर आपटले आहेत. गेल्या काही काळापासून सोने आणि चांदीच्या दरात सातत्याने घसरण होत असून या दरम्यान, मॉर्गन स्टॅनलीने सोन्याच्या दरात 40% वाढीचा अंदाज वर्तवला असताना चांदीचे वायदे विक्रमी उच्चांकापासून जवळपास निम्म्यावर आले आहेत.

शुक्रवारी, मल्टी कमोडिटी एक्सचेंजवर चांदीचे दर जवळपास 9000 रुपयांनी घसरून सुमारे 2.29 लाख रुपये किलोवर घसरले तर, या वर्षाच्या सुरुवातीला चांदीचे दर 4 लाख रुपये किलोच्या उच्चांकी किंमतीवर उसळले होते. US-Iran मध्ये शांतता करार आणि जागतिक बाजारातील दबावामुळे गुंतवणूकदारांनी मौल्यवान धातूची विक्री केली परिणामी, MCX वर शुक्रवारी सकाळी चांदीचा वायदा 8,766 रुपयांनी घसरून 2.28 लाख रुपये किलो झाला होता.

दोन दिवसात 20 हजारांनी स्वस्त झाली चांदी
आदल्या दिवशी, 19 जून रोजी, देखील चांदीच्या किंमतीत मोठी घसरण झालेली आणि चांदीचे फ्युचर्स 14,235 रुपये म्हणजे 5.7 टक्के घसरून 2.37 लाख रुपयांवर खाली झाले होते, तर बुधवारी चांदीची किंमत 2.51 लाखांवर उतरली होती. अशाप्रकारे, गेल्या दोन दिवसात चांदीचा दर 23 हजारांनी स्वस्त झाला ज्यामुळे खरेदीदारांना दिलासा मिळाला तर गुंतवणूकदारांची धडधड वाढली असेल.

स्वित्झर्लंडमधील उच्चस्तरीय चर्चा रद्द झाल्यामुळे अमेरिका-इराण यांच्यातील शांतता प्रक्रियेच्या यशाच्या आशा मावळल्या असून यामुळे शत्रुत्व कमी होण्याच्या शक्यतेबद्दल शंका निर्माण झाल्याचा विश्लेषकांचा अंदाज असून अमेरिकेचे उपराष्ट्रपती JD Vance यांनी आपला स्वित्झर्लंड दौरा पुढे ढकलला.

MCX वर दरांवर सतत दबाव कायम

जिनिवा येथे अमेरिकी उप-राष्ट्रपती जेडी वान्स यांच्या भेटीसाठी कोणताही इराणी शिष्टमंडळ उपस्थित राहण्याची पुष्टी झाली नाही ज्यामुळे होर्मुझ सामुद्रधुनीतून तेल वाहतूक पुन्हा सुरू करण्याच्या वेळापत्रकाबाबत नवीन प्रश्न निर्माण झाले. त्यातच MCX वर चांदीच्या दरात सलग चौथ्या आठवड्यात घसरण होत असून डॉलरच्या तुलनेत 6 आठवड्यांच्या उच्चांकावर पोहोचलेल्या रुपयाच्या मजबुतीमुळे विक्रीला अधिकच चालना मिळाली.

दुसरीकडे, आंतरराष्ट्रीय बाजारात जुलै चांदीचे फ्युचर्स 2.85 डॉलर म्हणजे 4.3 टक्के घसरून 63.46 डॉलर्स प्रति औंसवर घसरले आहेत. पश्चिम आशियात इराण-अमेरिकेतील युद्धाला ब्रेक लागला असला तरीही इस्रायलकडून सतत लेबनॉनवर हल्ले सुरूच आहेत ज्यामुळे अनिश्चिततेत भर पडली आहे. गुंतवणूकदार पश्चिम आशियातील घडामोडी, जागतिक व्याजदर आणि आर्थिक विकासाच्या दृष्टिकोनावर बारकाईने लक्ष ठेवून असल्याने सोन्याच्या किंमतीत अस्थिरता कायम राहू शकते.