Pune Metro: पुणेकर प्रवाशांना दिलासा; हिंजवडी मेट्रोबाबत प्रशासनाकडून मोठी घोषणा, वेळापत्रक जाहीर, १२ स्थानके कधीपर्यंत पूर्ण होणार?

NewsZenn Jun 19, 2026 16 0

पुणे: पुण्यातील सध्याच्या दोन मेट्रो मार्गिकांप्रमाणेच माण-हिंजवडी-शिवाजीनगर दरम्यानची मेट्रो मार्गिकादेखील सकाळी सहा ते रात्री ११ या वेळेत प्रवाशांसाठी कार्यरत राहणार आहे. सरासरी सहा ते आठ मिनिटांनी मेट्रो उपलब्ध होणार असून, पहिल्या टप्प्यातील १२ स्थानके जूनअखेरपर्यंत निश्चित पूर्ण केली जातील, असा विश्वास पुणे आयटी सिटी मेट्रोतर्फे गुरुवारी व्यक्त करण्यात आला.

मेट्रो स्थानकांची कामे पूर्ण झाल्यानंतर माण ते आर. के लक्ष्मण म्युझियम, बालेवाडी (रामनगर) या दरम्यानच्या मेट्रो सेवेचे उद्घाटन कधी करायचे हे राज्य सरकारतर्फे निश्चित केले जाईल, अशी माहिती पुणे आयटी सिटी मेट्रोचे मुख्य कार्यकारी अधिकारी (सीईओ) अनिलकुमार सैनी यांनी माध्यमांना दिली. मेट्रोच्या सर्व स्थानकांमधील लिफ्ट, सरकते जिने, प्रवासी सुविधा पूर्ण झाल्या असून, बाहेरील काही कामे अखेरच्या टप्प्यात असल्याचा दावा त्यांनी केला. पुण्यातील अन्य दोन मेट्रो मार्गिकांसोबत जिल्हा न्यायालय येथे हिंजवडी मेट्रोद्वारे ऑगस्ट अखेरपर्यंत प्रवास करणे शक्य होणार असल्याचे त्यांनी अधोरेखित केले. मेट्रो लाइन-३ साठी एकूण २२ ट्रेन संचाद्वारे प्रवासी सेवा दिली जाणार आहे. यापैकी १९ ट्रेन संच माण येथील डेपोमध्ये दाखल झाले असून, उर्वरित तीन संच काही दिवसांत दाखल होतील. नागरिकांना व्हॉट्सॲप आणि ॲपद्वारे तिकीट घेता येणार आहे, असे सैनी यांनी सांगितले.

तिकिटांवर सवलत नाही

महामेट्रोमध्ये दर शनिवार-रविवारी सर्व प्रवाशांना तिकीट दरांत ३० टक्के सवलत दिली जाते. हिंजवडी-शिवाजीनगर मेट्रोमध्ये अशा स्वरूपाची सवलत देण्याची तरतूद ‘सवलत करारनाम्या’मध्ये (कन्सेशन ॲग्रीमेंट) नाही. त्यामुळे प्रत्यक्ष मेट्रो सुरू झाल्यानंतर प्रवाशांच्या प्रतिसादानुसार तिकीट सवलतीबाबतचा निर्णय घेण्यात येईल, असे संकेत सैनी यांनी दिले.

दरम्यान, महामेट्रोकडून सध्या मेट्रो प्रवाशांसाठी ‘वन पुणे’ नावाचे मोबाइल ॲप उपलब्ध आहे. याच ॲपद्वारे मेट्रो लाइन-३चे तिकीट प्रवाशांना घेता यावे, यासाठीचे प्रयत्न सुरू आहेत. मेट्रो कार्यान्वित झाल्यानंतर व्हॉट्सॲपद्वारे तिकीट घेण्याची सुविधा उपलब्ध असेल आणि पुढील काही महिन्यांत शहरात एकाच ॲपद्वारे कोणत्याही मेट्रोतून प्रवास करणे नागरिकांना शक्य होणार असल्याकडे सैनी यांनी लक्ष वेधले.